Чейнина, Ольга Алексеевна
Чейнина Ольга Алексеевна (кыс ӧбӧкӧзи Суразакова) 30 јылдыҥ туркунына Саратан јуртта эмчи болуп иштеген. 1983 јылдыҥ јаҥар айыныҥ 20-чи кӱнинде «Ветеран Труда СССР» деп адаткан.
| Ольга Алексеевна Чейнина | |
|---|---|
Биографиязы
тӱзедерЈаан јашту Орсулова Варвара Даниловнаныҥ эске алынганыла 1938 јылда,Саратан јуртта баштапкы эмчи болуп Чайкина Парасковья иштеген. 1941јылда ол Ада Тӧрӧл учун Улу јууга јӱре берген. Оныҥ кийнинде иштеерге Кольчикова Дарья Николаевна келген. 1943 јылда ол база јууга атанган. 1948 јылга јетире эмчи јуртта јок болгон, оноҥ Назарова Надежда Андреевна иштеген. 1949—1950 јылдарда Манеева Мария Николаевна иштеп келген. 1951 јылда Чеконов Иван Николаевич келген. 1954 јылда куран айдыҥ 9-чы кунинде ӱредӱзин божодоло Суразакова Ольга Алексеевна иштеп келген. Амыралтага барганча бу ла јуртта иштеген.
Ольга Алексеевна 1933 јылда, кичӱ изӱ айдыҥ 21 кӱнинде Майма аймакта Карасук јуртта чыккан. Адазы Суразаков Алексей анчы кижи болгон. Јиит ле тужында оорудан улам божоп калган. Энези Савкина Арина Александровна колхозтын ишмекчизи ле болуп јӱрген. Јууныҥ кӱч ӧйинде балдар јаан улусла теҥ тай иштеген. Ольга Алексеевна 12-13 јаштуда фермада учетчик болуп, абралу, јууныҥ инвалиди, јаҥыс колду кижиле кожо флягалу сӱтти јууп сӱтзаводко апарып тургандар. 1952 јылда областной национальный школдо 7 классты божоткон. Оноҥ ары эмчиниҥ ӱредӱзине кирип, 1954јылда божоткон.[1]
Иштеерге јиит кысты ыраак Улаган аймактыҥ Саратан јуртына ийген. Бу ла ӧйдӧҥ ала амыралтага 1984 јылда чыкканча эмчи болуп иштеген. Баштапкы ӧйлӧрдӧ ого сӱрекей қӱч болгон, алтай тил билбес, орус албаты ортозында чыдаган балага, ыраак Саратанда јӱрӱмге эптежип, улусла куучындажар керек болгон. Је јана баспас јиит кижи, ончо уур кӱчтерди ӧдӱп, алтай тил ӱренип, јакшы иштей берген. Кичӱ изӱ айдыҥ 20-чи кӱнинде 1955 јылда Ольга Алексеевна Чейнин Ким Антоновичле айыл-јуртту болуп, беш бала азырап чыдаткан: Надежда, Вера, Сергей, Светлана, Алексей. Јаан кызы Надежда узак јылдарга немецкий тилдиҥ ӱредӱчизи болуп иштеген. Вера тӱӱкиниҥ уредӱчизи болуп узак јылдарга иштеген, бир кезек ӧйдӧ Саратанныҥ орто ӱредӱлӱ школдыҥ директоры болуп иштеген. Ол ло ӧйдӧ јурттыҥ тӱӱкизин јууп, школдыҥ ӧмӧлигиле кожо кичинек музей ачкан Саратан јурттыҥ тӱӱкизиле. Уулы Сергей Кимович Улаган аймактыҥ РОВД-ныҥ бӧлӱгинде иштеген, он јылдан ажыра аймакта ГИБДД-ны башкарган. Кызы Светлана английский тилдиҥ ӱредӱчизи болуп калада республиканский гимназияда јирме јылдан ажыра иштеп јат. Алексей телемастердиҥ ӱредӱзин божодып, тӧрӧл јуртында иштеп јат.
Ижи
тӱзедер1954 јылдан бери иштеп, јуртта чыккан қӧп балдардыҥ киндик (кӧй) энези болуп, јаан томјыда јӱрген. Ол ӧйдӧ ыраак турлуларга једерге кӧӧлик јӱрер јолдор јок болгон. Кандый да ыраак тайгада кижи оорыза, ого атту једип, ончозын эмдеер керек болгон. Оору улуска тӱнде де, јут-јулакай кӱнде де барарга келишкен. Школдыҥ интернадында јаткан малчылардыҥ балдарыныҥ су- кадыгын шиҥдеп, ару-чек болорго ӱреткен. 30 јылдыҥ туркунына канча кижиниҥ јӱрӱмин аргадап. бойын бир де карамдабай иштеген. Јурттыҥ улузыныҥ ортодо јаан томјыда болуп, јондык иште экпиндӱ турушкан[2]. Канча катап јурт језениҥ депутады болуп кӧстӧлгӧн, ӱй улустыҥ биригӱзин кӧп катап башкарган. 1984 јылда су-кадыгы уйадап, амыралтага барган. 2005 јылда кандык айдыҥ 17-чи кӱнинде јаан оорудаҥ улам јада калган.
Кайралдары
тӱзедер- «Отличник здравоохранения»значокло (1962)
- «За доблестный труд в ознаменование 100-летия со дня рождения В. И. Ленина» (1970)
- «Победителю соцсоревнования» (1973 ле 1976)
- «Медаль материнства» (1968)
- «Ветеран Труда СССР» (1983)